Aprelniñ 24-ne keçer gecesi dünya musulmanları mübarek Ramazan ayını qarşıladı. İslâm dinini kütken er bir insan bu ay devamında oraza tutıp, tañdan kün batqanına qadar aş, suv ve tütün içmekten vazgeçmeli.
Kyivdeki Qırım musulmanları müftisi Ayder Rustemov, Ülemalar Şurası bu sene Ramazan ayınıñ ilk künü olaraq aprelniñ 24-üni ilân etmege qarar aldı, dep bildirdi.
«UMMA» Ukraina musulmanları diniy idaresiniñ müftisi Said İsmagilov müminlerni tebriklep, bu sene koronavirus telükesi sebebinden Ramazannıñ hususiyetlerini añlattı.
«Böyle Ramazannı ilk sefer körem – cemaat iftarları olmaycaq, camide teravih namazları ve cuma namazları bile qılınmaycaq. Bu sınav bizim başımızğa da keldi, çünki Yüce Allahtan olğan er şey mıtlaqa olacaq. Er kes dindaşlarınıñ yanında olmayıp, iman, sabır ve cümertlik küçüni kösterecek iman imtianıdır. Amma büyük sınavlarnıñ büyük mukâfatı bar, ve bunı qazanmalımız», – dep qayd etti o.
Rusiye kontrolindeki Qırım ve Aqyar musulmanları diniy idaresi (QAMDİ) de mubarek ay munasebetinen hayırlavını derc etti. Mında dünyadaki zor epidemiologik vaziyetke baqmadan, 2020 yılında acılıq olacağına ümüt eteler ve azırlıq köreler.
QAMDİ koronavirus telükesi sebebinden yarımada camilerinde namazlarnıñ qılınmasını ve maarifçilik tedbirleriniñ keçirilüvini toqtattı.
Qırımtatar Milliy Meclisiniñ reisi Refat Çubarov da musulmanlarnı oraza başlağanınen tebrikledi.
Qırımtatar asıllı ukrainalı yırcı Jamala Ukraina ve dünya musulmanlarını Ramazannen hayırlamaq içün video muracaatını çıqardı. Musulmanlarnı Ukraina Tış işler naziri Dmıtro Kuleba da tebrikledi.
Saudiy Arabistanda COVID-19 koronavirus pandemiyası sebebinden çoq asırlar devamında ilk sefer Mekkedeki Mescid-i Haramnı ve Medinedeki Peyğamber Mescidini belli olmağan müddetke qapattılar. Martnıñ 17-nde Saudiy Arabistan akimiyeti bütün camilerde ibadetlerni yasaqladı.
Al-azırda yañı çeşit virus tarqaluvı sebebinden dünyadaki camilerniñ ekseriyeti qapalı qala. Bazı musulmanlar evleriniñ yanına ya da qapalı camilerniñ yanına ibadet qılmağa çıqa.
Ramazan – musulmanlarnıñ oraza ayıdır, bir ay devamında insanlar tañ atqanından kün batqanına qadar aş, suvdan ve mahrem munasebetlerden vazgeçe. Ramazan ayında oraza tutmaq Allahqa daa yaqın olmaq ve zorluq çekkek insanlarnı hatırlamaqtır.
Dünyada 1,8 millionğa yaqın musulman bar, bu dünya ealisiniñ yüzde 24-ü ola.
