“Musulmanlar terrorcı degil”: Qırımda mahküm etilgen qırımtatarlarğa qoltutuv fleşmobnı ötkereler (süret toplamı)

Şimaliy-Kavkaz okrugınıñ arbiy mahkemesi dekabrniñ 24-nde Bağçasaraydaki birinci «Hizb ut-Tahrir davası» mabüsleriniñ ükmüni çıqardı.

Enver Mamutovğa şiddetli rejim koloniyasında 17 yıllıq apis cezası mahküm etildi, Ruslan Abiltarov, Remzi Memetov ve Zevri Abseitovğa -şiddetli rejim koloniyasında 9 yıllıq apis cezası mahküm etildi.

Bir kün evel "Qırım birdemligi"niñ koordinatorı, davanıñ iştirakçilerinden birisi Remzi Memetovnıñ oğlu, Dilâver Memetov "Musulmanlar_terrorcı_degil" fleşmobnı ilân etti

Fleşmob çerçivesinde mahküm etilgen qırımtatarlarğa qol tutuvını ve birdemligini köstermek içün bütün Qırimdan insanlar süretlerini derc etip başladı.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti. (Süretler - "Qırım birdemligi")