Salı künü, iyülniñ 20-nde, musulmanlar büyük bayramlardan biri olğan Qurban bayramını qayd ete. Qırımtatarlar onı Qırımda ve esas Ukrainada qayd ete. Qırımda raatlıq künü ilân etildi.
Qırım Muhtar Cumhuriyeti musulmanları diniy idaresi iyülniñ 20-nde saba Kyiv camisinde bayram namazı qılınacaq, dep bildirdi.
Qırım camilerinde de saba bayram namazı qılındı.
Rusiye kontrolindeki Qırım ve Aqyar musulmanları diniy idaresi insanlar koronavirus ile küreş tedbirlerinden haberdar etildi, dep bildirdi, hususan şahsiy namazlıq, qoruyıcı maska, antiseptik qullanılması ve mesafe qorunması aqqında tenbilendi.
Rusiye kontrolindeki Qırım ve Aqyar musulmanları diniy idaresiniñ yolbaşçısı Emirali Ablayev eki yıldan berli koronavirus pandemiyası Qırım musulmanlarına Mekke ve Medinege acılıqqa barmağa imkân bermey, dep qayd etti.
«Eki yıldan berli bitmegen koronavirus pandemiyası sebebinden bayram alışmağan tarzımızda keçe. Eki yıldan berli qırımlı musulmanlarnıñ Mekke ve Medinege acılık yapmağa imkânı yoq. Amma bütün sınavlar Yüce Allahtan. Ve bu sınavlarğa nasıl dayanıp yeñecegimiz bizge bağlı», – dep aytıla iyülniñ 20-nde Qırım ve Aqyar musulmanları diniy idaresiniñ saytında.
Qurban bayramı – musulmanlarnıñ eñ büyük bayramlarından biri olıp, Mekkege acılıqnıñ soñuna kelgenini temsil ete. Oraza Bayramından 70 kün keçken soñ qayd etile.
Qurban Bayramı büyük meydanlarda cemaat ile qılınğan bayram namazından başlana ve ondan soñ qurban çalına. Bu ananeniñ tamırları Allahnıñ İbraim peyğamberge oğlu İsmailni qurban ketirmege bermeyip, qoynı kesmege buyurıp toqtatqanından kele.
