Mayısnıñ 13-nde, cumaaqşamı künü, musulmanlar islâmdaki eki esas bayramdan birini – Oraza bayramını qayd eteler. O, islâmnıñ muqaddes Ramazan ayınıñ bitmesini bildire.
Oraza bayramı, 30 künlük orazadan soñ üç kün devam ete ve Qurban bayramından soñ ekinci eñ müim musulman bayramıdır.
QMC musulmanları Diniy idaresiniñ müftisi Ayder Rustemov er kesni bayramnen hayırlap, «tınçlıq, muabbetlik ve baht» tiledi.
«Bu bayramnı tuvğan topraqlarınıñ işğali şaraitinde ve işğalci akimiyetniñ devamlı tazyığı altında qarşılıamaq mecburiyetinde qalğan bütün musulmanlarnı, hususan semetdeşlerimini can-yürekten hayırlayım. Er keske iman ve küç tileyim!» – dep yazdı Qırımtatar halqınıñ milliy lideri Mustafa Cemilev Facebook saifesinde.
Rusiye nezaretinde olğan Qırım ve Aqyar musulmanları Diniy idaresiniñ müftisi Emirali Ablayev öz hayırlavında, «bu bayram künlerinde insanlarnı tek öz balalarına degil, yetimlerge de ediyeler bermege, büyüklerni ziyaret etmege ve yañğızoarnı unutmamağa» çağırdı.
Qırımda Oraza bayramı munasebeti ile mayısnıñ 14-yu raatlıq künüdir.
2020 senesi Ukraina prezidenti Volodımır Zelenskıy, Qurban bayramına ve Oraza bayramına devlet diniy bayramı statusını berecek buyruqnı imzalamağa niyetinde olğanını bildirgen edi.
Oraza bayramı künleri yaqınlar tebriklene, mezarlar ziyaret etile, yardımğa muhtac olğanlarğa para berile. Musulmanlar bayram namazı ögüne fitir parasını bermek kerek.
