"Sarı şerit" faalleri Ukrayina Mustaqillik Künü munasebetinen Aqmescit suv anbarı yanında Ukrayina bayrağını köterdiler, dep haber etile areketniñ telegram kanalında.
Qayd etilgenine köre, Ukrayina destegine plakatlar ve timsaller Aqyar, Aqmescit, Yalta, Aluşta, Simeizde peyda oldı. Faaller ukrayinlerni tebriklep , ZSU-ğa inanmağa çağırdı.
"Qırım er alda ukrayin qalacaq. "Sarı Şerit" faalleri diger dost yerastı areketlerinen beraber muqavemet köstermege devam eteler ve er kesni Mustaqillik Künü ile hayırlaylar! ZSU-ğa inanıñız ve unutmañız ki, işğalde Ukrayinanı pek bekleyler. Ve olar kerçekten de bekleycekler. Şan olsun Ukrayinağa", — dep aytıla hayırlavda.
Avgustnıñ 24-nde Ukrayinada Mustaqillik Künü qayd etile.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz
