Ukrayına Mustaqillik Kününde Rusiye ordusı 58 Ukrayına mesken yerine ateş açtı, dep bildirdi Ukrayına İç işler naziriniñ birinci muavini Yevğen Yenin.
«Avgustnıñ 24-ü – Rusiye içün ayrı bir kün, canavar işleri içün qullanmasa ediler, olmaz edi. Ne yazıq ki, İç işler nazirligi tenbilegeni kibi, tünevinki mustaqillik bayramına rusiyeliler büyük zalımlıqnen zarar ketirdi. Birinciden, mesken yerlerge açılğan ateş sayısı arttı. Keçken künü polis 58 mesken yerge ateş açılğanını qayd etti – eskiden bayağı çoq ateş açıldı. Ateş neticesinde onlarnen insan öle ve yaralana», – dep bildirdi Yeninniñ aytqanlarını İç işler nazirliginiñ matbuat hızmeti «1+1» telekanalınıñ yayınında.
O, Dnipropetrovsk vilâyetinde tren stantsiyasına kerçekleştirilgen raketa darbesini ayttı, soñki malümatqa köre, anda 25 insan elâk oldı, 31 kişi yaralandı.
Yeninniñ aytqanına köre, keçken künü Ukrayınada sahte mayınlaştıruv haberleri de oldı: «Telefon terroristleri Vinnıtsâ, Rivne, Hmelnıtskıyde tren vokzallarına «mayın qoydı». Gizli mesaclar Lviv, Mukaçeve, Dniproda da oldı. Umumen polis bölükleri 17 haber aldı, 118 obyektke mayın qoyulğanı aytıldı. Tahliye etilgen insanlarnıñ sayısı 3800 oldı», – dep ayttı İç işler naziriniñ birinci muavini.
Onıñ bildirgenine köre, avgustnıñ 24-nde sapörlar işğalden azat etilgen yönelişlerni patlav telükesi olğan şeylerden temizlep başladı. Kyiv vilâyetinde daa 32 gektar temizlendi, Sumı, Çerniğiv, Çerkası vilâyetlerinde de gektarlar aqqında aytıla, dedi Yenin.
Ukrayına Mustaqillik Kününde avgustnıñ 24-nde 189 telüke signalı oldı – bunı Ukrayınada telüke signallarınıñ haritasını taqip etken «Telüke» qullanımı köstere.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayınanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
