Rusiyeniñ Rostov-na-Donu şeerindeki Cenübiy okrugınıñ arbiy makemesinde "Canköyden Qırım musulmanları davasınıñ" mabüslerine nisbeten keçirilgen makeme oturında imayeniñ tarafı mustaqil daktiloskopik ekspertizanıñ neticelerini taqdim etti. Berilgen malümatqa köre, tintüvler vaqtında qırımtatarlardan alınğan kitaplarda olarnıñ parmaq izleri yoq.
Bu aqta "Qırım birdemligi" cemaat birleşmesine advokat Emil Kürbedinov ikâye etti.
Onıñ aytqanına köre, ekspertler kitaplarda "onğa yaqın insannıñ parmaq izi bar, amma müvekkilleriniñ parmaq izleri yoq" dep tasdıqlağan.
Dava mabüsleri — Enver Kroş, Vilen Temeryanov, Rinat Aliyev, Edem Bekirov — taqiqat dava boyunca delillerni sahteleştirdi, dep sayalar. Olar makemege muracaat etip, arbiy taqiqat komitetine delillerni teşkermek içün arizalarnı yollamağa rica ettiler. Amma makemeci Timur Maşukov bu muracaatlarnı red etti ve imayeniñ ekspertizasını davağa kirsetmedi.
Saban ayınıñ 19-nda olacaq nevbetteki toplaşuvda taraflar munaqaşağa keçecek. Birinci olaraq qabaat tarafı çıqışta bulunacaq.
2022 senesi arman ayınıñ 11-nde saba Qırımnıñ Canköy ve Canköy rayonında qırımtatar faalleriniñ evlerinde kütleviy tintüvler keçirildi, advokatlarnı tahqiqat tedbirlerine yibermediler, olar mobil bağnıñ kesilgenini bildirdiler. Vilen Temeryanova, Enver Kroş, Seityaya Abbozov, Murat Mustafayev, Edem Bekirov ve Rinat Aliyevni Rusiye quvetçileri Rusiyede yasaq etilgen "Hizb ut-Tahrirde" iştirak etkenlerinde qabaatlap yaqaladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
