Bağçasarayda kütleviy tintüvlerden soñ apiske alınğan «Qırım birdemligi» faali Seydamet Mustafayevni tıraş olmağa ve saçını qırqmağa zorladılar.
Mustafayev bir kişilik kamerağa alındı. Bu aqta advokat Safiye Şabanova bildirdi. Onı o, Aqmescit şeeriniñ ekinci tahqiqat izolâtorında ziyaret etti, dep haber ete «Qırım birdemligi».
«SİZOda oña basqı yapılmay, amma birinci SİZOğa baqqında şaraitler daa sert. Kündüz yatmağa yasaq. Seydamet kamerada özü karantinde olğanı içün subet yetmey, dep şikâyet ete. Kezinti vaqtında sport yapmağa izin berilmey», – dep tarif etti Safiye Şabanova.
Safiye Şabanova müvekkiliniñ alı yahşı, haberlerni soray, özüni qabaatsız dep saya, dep qoştı.
Berilgen malümatqa köre, avgustnıñ 24-nde apiske alınğan qırımlı faal Amethan Umerovnı Aqmescit şeerindeki SİZO-2-de tıraş olmağa mecbur ettiler.
Avgustnıñ 24-nde Bağçasarayda ve Bağçasaray rayonında Rusiye uquq qoruyıcıları qırımtatarlar Ruslan Asanov, Seydamet Mustafayev, Remzi Nemetulayev, Abdulmecit Seytumerov, Amethan Umerov ve Eldar Yakubovnıñ evlerinden tintüv keçirdi. Bundan soñ olarnı Aqmescitteki FSB binasına alıp ketkenler. Avgustnıñ 25-nde Rusiye mahkemesi olarnı eki ayğa SİZOğa yolladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
