Aq qorçalayıcı ve «ekinci Bağçasaray gruppasınıñ» mabüsi Server Mustafayev Tambovdaki Rusiye tüzetüv koloniyasınıñ ceza izolâtorına qapatıldı. Bu aqta «Qırım birdemligi» cemaat birleşmesi haber ete.
Advokat Lilâ Gemeci bildirgenine köre, bundan evel qırımlı tazir aldı, nezaretçiler izolâtordan soñ mabüsler içün sert ve sıñırlanğan bir yerge ketecek, dep qorquzdı. Şimdi Mustafayev soy-soplarınen bağlanıp olamay.
Keçken sefer, aq qorçalayıcı ceza izolâtorına qapatılğanda, oña içmege bermey ediler, pek az aş berile edi, dep qayd ete Gemeci. Onıñ aytqanına köre, nezaretçiler kitaplarnı da, hususan Qurannı da tutıp alğan edi.
«Böylece, Mustafayev qanunsız maneviy basqığa oğratıla dep tahmin etmek içün sebeplerim bar. Nizam cezaları ve ceza izolâtorına qapatuv vastasınen basqı yapıla», – dep qayd etti advokat.
Server Mustafayev – «Qırım birdemligi» cemaat birleşmesiniñ koordinatorı. 2018 senesi tintüvlerden soñ uquq qoruyıcılar Server Mustafayev ve Edem Smailovnı apiske aldı.
2020 senesi sentâbrniñ 16-nda Rostov-na-Donudaki Cenübiy okrugınıñ arbiy mahkemesinde qırımlı aq qorçalayıcı 14 yılğa azatlıqtan marum etildi. Qabaatlar Bağçasaraydaki «Hizb ut-Tahrir davasına» ilâve etildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
