Front Line Defenders halqara aq qorçalayıcı teşkilâtı dekabrniñ 9-nda kene 10 künge apiske alınğan «Qırım birdemligi» koordinatorı ve cemaat imayecisi Mustafa Seydaliyevniñ taqip etilüvini takbih etti.
Bu aqta aq qorçalayıcı teşkilâtnıñ resmiy saytında haber etile.
«Front Line Defenders teşkilâtı, işğal etilgen Qırımda Rusiye uquq qoruyıcı organları tarafından aq qorçalayıcılarnıñ taqip etilüvinden qasevetlene. Front Line Defenders Mustafa Seydaliyevniñ taqip etilüvini takbih ete ve oña qarşı qabaatlavlarnı barışıq aq qorçalayıcı faaliyetiniñ aqibeti dep saya», – dep aytıla haberde.
Hatırlatamız, dekabrniñ 9-nda Rusiye kontrolindeki Qırımnıñ İslâm Terek rayon mahkemesi «Qırım birdemliginiñ» koordinatorı ve cemaat imayecisi Mustafa Seydaliyevni eki protokol boyunca «ekstremist malümatlarnı azırlav ve bastıruv» sebebinden 10 künge apiske aldı.
Seydaliyevniñ evelki memuriy apis alınuvı dekabrniñ 7-nde yekünlendi, lâkin oña qarşı yañı qabaatlavlar tanıtıldı ve polis bölüginden yiberilmedi.
Aqmescitte noyabrniñ 23-nde aqşam Rusiye quvetçileri azatlıqqa çıqqan Edem Semedlâyevni qarşılamaq içün vaqtınca tutuv izolâtorınıñ binasına kelgen faallerni tuttı. 31 insan tutuldı, aralarında 10 qadın, jurnalistler ve matbuat kartları olğan «Qırım birdemliginiñ» mühbirleri bar. Tutulğanlar üç polis bölügine alıp ketirildi.
Aqmescitniñ vaqtınca tutuv izolâtorınıñ binası ögünde tutulğan 15-ten çoq qırımtatar faali Rusiye kodeksiniñ memuriy maddesine istinaden apiske alındı.
Qırım Muhtar Cumhuriyeti ve Aqyar prokuraturası qırımtatar faalleriniñ tutuluvı sebebinden cinaiy tahqiqat başlattı.
Ukraina akimiyeti, aq qorçalayıcılar, çetel elçihaneleri ve missiyaları Rusiyeni Qırımda böyle taqiplerni toqtatmasına çağıra. Rusiye akimiyeti böyle çağıruvlarnı körmemezlikke ura.