Qırımtatar halqınıñ lideri Mustafa Cemilevniñ ömür arqadaşı Safinar Cemileva «yaramayıp», Türkiyedeki hastahanelerden birine acele tahliye etildi, dep bildirdi Qırımtatar Milliy Meclisiniñ reisi Refat Çubarov.
«Safinar Cemileva, qırımtatar milliy areketiniñ veteranı, Qırımtatar qadın-qızlar birliginiñ reisi, qırımtatar halqınıñ lideri Mustafa Cemilevniñ ömür arqadaşınıñ sağlığı birden fenalaşqan soñ onı Türkiyedeki hastahanelerden birine acele tahliye etmege kerek oldı. Qırımtatar Milliy Meclisi Türkiye Cumhuriyetiniñ prezidenti Recep Tayyip Erdoğanğa Türkiye tarafınıñ Safinar Cemilevağa acele yardım köstergeni içün teşekkürler bildire», – dep yazdı Çubarov Facebookta.
Al-azırda Safinar Cemileva Ankara hastahanesinde buluna ve alı bir qarar sayıla.
«Türkiye Tış işler nazirligine, Türkiyeniñ Ukraina elçisi Yağmur Ahmet Gülderege Kyivge mahsus sanitar uçağınıñ yollanılmasınen bağlı bütün meselelerin tez al etmege yardım etkenleri içün teşekkürler bildiremiz», – dep bildirdi Çubarov.
Safinar Cemilevanıñ raatsızlav sebepleri belli degil. Qırım.Aqiqat tafsilâtlı malümat almağa tırışa.
Safinar Cemileva Qırımtatar qadın-qızlar birliginiñ reisi ola. 2015 senesi dekabrniñ 26-nda ofisi Gasprinskiy Qırımtatar cumhuriyet kütüphanesinde olğan cemaat teşkilâtını kütüphane reberligi binadan quvıp başladı. Başta ofiste elektrikler ve qızdıruv kesildi, soñra binanı boşatmağa talap etip başladılar. Safinar Cemileva 2016 senesi sentâbrniñ 18-nde Qırımda teşkil etilgen Rusiye Devlet dumasınıñ saylavlarını boykot etti.
2017 senesi Cemilev Safinar Cemileva Rusiye pasportını almağanı içün Rusiye işğali altındaki Qırımdan sürgün etile bile, dep bildirgen edi.
