«60-ıncı yıllarnıñ ortalarında böyle bir tedqiqat yaptıq – soy-sopları vefat etken er kesni soraştırdıq. Körgen raqamımızğa köre, sürgünlikten soñ ilk eki yılında qırımtatar halqınıñ tahminen 46%-ı elâk oldı», – dep ayttı Cemilev.
Onıñ fikirince, Ukrayına Yuqarı Radası bu sürgünlikni adaletli bir şekilde genotsid dep tanıdı. «1944 senesiniñ sürgünliginden soñ tek qırımtatarlar yoq etilmedi, qırımtatarlarnen bağlı er şey yoq etilgen edi», – dep qayd etti Cemilev.
Rusiye qırımtatar halqını ilk sefer yoq etmege tırışmadı, dep ayta Cemilev. O, 1783 senesi Rusiye imperiyası Qırımnı zapt etken soñ qırımtatarlar akimiyetniñ basqısı altında qomşu Osmanlı imperatorlığına ketmege mecbur edi. «Ve şimdi qomşu Türkiye Cumhuriyetinde qırımtatar asıllı Türkiye vatandaşları, farqlı raqamlarğa köre, üç milliondan beş millionğa qadar bar», – dep bildirdi qırımtatar halqınıñ lideri.
Qırımtatar halqı milliy lideriniñ tolu intervyüsını cumaertesi künü, mayısnıñ 18-nde, Qırım.Aqiqat saytında ve Qırım.Aqiqatnıñ YouTube kanalında oquñız.
1944 senesi mayısnıñ 18-nde Sovet rejimi Qırımdan Orta Asiyağa bütün qırımtatar halqını sürgün etti. Üç kün içinde 200 biñ qırımtatar mal vagonlarında Vatanından alıp çıqarıldı.
Er yıl Qırımda qırımtatar halqı sürgünliginiñ qurbanlarını añma tedbirleri, hususan Qırım paytahtıla matem mitingi keçirile edi. Amma Rusiye Qırım yarımadasını işğal etken soñ Aqmescitniñ merkezinde böyle aktsiyalarnıñ keçirilüvi yasaqlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
