Qırımtatar halqınıñ lideri Mustafa Cemilev Sema Yüzü Qaramanlarını añdı. Bu aqta Cemilevniñ Facebook saifesinde haber etile.
Cemilev, Kyivdeki İnstıtutska soqağında Euromaydannıñ elâk olğan iştirakçileriniñ fotoresimlerine çeçek qoydı.
Ukrainada noyabrniñ 21-nde İtibar ve Azatlıq Künü qayd etile – bu künde başlağan eki inqilâp munasebetinen: Portaqal inqilâbı (2004) ve İtibar inqilâbı (2013). Bu bayram 2005 senesinden 2011 senesine qadar Azatlıq künü olaraq qayd etilgen edi. Viktor Yanukoviç zamanında onı yanvarniñ 22-nde qayd etilgen Birlik kününen birleştirip lâğu etkenler.
2014 senesi Ukrainanıñ beşinci prezidenti Petro Poroşenko onıñ resmiy statusını ğayrıdan tikledi. O vaqıttan berli Ukraina Portaqal inqilâbı ve Euromaydannıñ yıllığını bir künde qayd ete.
