Qırımtatar Milliy lideri, Ukraina halq deputatı Mustafa Cemilev, Rusiye Qırımnı Ukrainağa qaytarmaq kerek, aks alda memleket sanktsiyalar altında qalacaq, dep ayttı. Bunı Cemilev sentâbrniñ 18-nde derc etilgen BBS News Ukrainağa bergen intervyüsında bildirdi.
Cemilev hatırlattı ki, Rusiye yarımadanı işğal etip, bir sıra problemge, şu cümleden halqara basqığa ve iqtisadiy sanktsiyalarğa oğradı.
«Rusiye Qırımğa kirmemek ve Ukraina ile cenkleşmemek kerek edi. Putin, Rusiyege duşman yapamaycaq zarar ketirdi. Şimdi keri qaytamaylar. Er şey Putinge ( Rusiye prezidenti Vladimir Putin – QA) bağlı, amma yaqın insanları arasında ondan da beter soyları bar eken. Rusiye Qırımnı qaytarmaq kerek, çünki sanktsiya ve problemler bitmeycek. Bunıñ Putin akimiyeti vaqtında olması pek zor», – dep qayd etti Mustafa Cemilev.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini takbih etken edi. Ğarp memleketleri bir sıra iqtisadiy sanktsiyanı kirsetken edi. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra. Ukraina Yuqarı Radası, Qırım ve Aqyarnıñ vaqtınca işğaliniñ başlanğıç künü olaraq 2014 senesi fevralniñ 20-sini tanığan edi.
