Link açıqlığı

Saatnıñ esas haberi

Mustafa Cemilev Radada çıqışta bulundı: «Ayatımnıñ manası – Qırımnıñ işğalcilerden qurtarılğanını körmektir»


Yuqarı Rada deputatı, qırımtatar halqınıñ milliy lideri Mustafa Cemilev ayatınıñ esas maqsadı Rusiye işğal etken Qırımnı azat etecek faaliyeti ola, dep bildirdi. Bu aqta o, avgustnıñ 29-nda Yuqarı Radada Radanıñ spiker muavini vazifesine saylanuv boyunca rey berüv ögüne çıqışta bulunıp ayttı.

Cemilevniñ qayd etkenine köre, namzetiniñ spiker muavini vazifesine «Yevropeyska solidarnist» fraktsiyası tarafından kösterilmesi onıñ içün «beklenilmegen bir şey oldı» ve bu «büyük şeref ve pek büyük mesüliyet» ola.

Qırımtatarlarnıñ lideri Qırım işğali sebebinden qırımlı halq deputatları çetel ziyaretleri, halqara forumlarda iştirak etüv, diplomatlar, cemaatçılar ve köçip kelgenlernen körüşüvlernen bağlı bir sıra tedbirler ala, dep hatırlattı.

«Men 30-40 yaşlarında degilim, yaşım eki qat büyük, bu vazifedeki işim qalğan ömrümniñ esas maqsadı – Qırımnıñ yüzsüz işğalcilerden qurtarılğanını körmek – faaliyetime belli zarar ketire bile», – dedi Mustafa Cemilev.

Aynı vaqıtta, o, onıñ bu vazifede bulunması «Qırımnı işğalden qurtaruv ve Ukraina topraq bütünliginiñ ğayrıdan tiklenmesi meseleleriniñ Yuqarı Rada faaliyetinde er daim müim yer alacağına, belki, yardım ete bilir edi», dep qayd etti.

Daa evel belli olğanı kibi, «Yevropeyska solidarnist» («Avropa birdemligi») firqası IX çağırılış Yuqarı Radanıñ spiker muavini vazifesine qırımtatar halqınıñ lideri Mustafa Cemilevniñ namzetini teklif etti.

Bundan evel «Yevropeyska solidarnist» («Avropa birdemligi») firqası Yuqarı Radanıñ insan aqları ve Donbas ve Qırım meseleleri Komitetiniñ reberlik vazifelerinden birine Qırımtatar Milliy Meclisiniñ reis muavini Ahtem Çiygoznıñ namzetini teklif etti.

Qırımtatar halqınıñ milliy lideri Mustafa Cemilev, Qırımtatar Milliy Meclisiniñ reis muavini Ahtem Çiygoz, Qırımtatar Milliy Qurultayınıñ delegatı Rustem Umerov, bloger ve qırımlı dizayner Yelizaveta Bogutskaya Ukraina Yuqarı Radasına siyasiy küçleriniñ cedvelleri boyunca keçtiler.

XS
SM
MD
LG