Ukrayina medeniyet fondu qırımtatar halqınıñ lideri Mustafa Cemilev aqqında tarif etken «Oksigen stantsiyası» filminiñ ingliz versiyasını azırlamaq içün grant ayırdı, dep bildire film müellifleri Facebook saifelerinde.
«Bu qoltutuv sayesinde noyabr ayında film ingliz dublâjınen azır olacaq. Bu işbirligi 4ears studiyasından bu ğayeni kerçekleştirmege yardımcı olacaq acayip mütehassıslar sayesinde kerçek oldı», – dep aytıla haberde.
Müelliflerniñ Qırım.Aqiqatqa tarif etkenine köre, filmniñ ingliz tili üzerinde iş onı daa keniş auditoriyağa, hususan Şimaliy Amerika, Büyük Britaniya, Astraliya ve diger memleketler içün açıq yapacaq.
«Oksigen stantsiyası» filmi Ukrayina, Çeh Cumhuriyeti, Slovakiya ve İsveçiya arasında işbirliginde yapıldı. Filmniñ dünya premyerası 2023 senesi Tallinn: Black Nights Film Festivalde oldı, 2025 senesi aprelniñ 10-nda ukrayin relizi taqdim etildi.
Levha Cemilevniñ ayatından müim bir parçanı köstere – 1980 senesi Yakutiyadaki Zırânka qasabasında qalğan sürgünni. Filmde rollerni Boris Orlov, Kristina Deylik, Viktor Poltoratskiy, Edem İbadullayev, Vâçeslav Jila, Yelena Vahramayeva, em de Rusiyeniñ Ukrayinağa qarşı cenkte elâk olğan Vasil Kuharskiy oynadılar.