Rusiye kontrolindeki Ermeni Bazar şeer mahkemesi «Mustafa Cemilev davası» boyunca delillerni tedqiq etmege devam etti. Advokat Nikolay Polozovnıñ Qırım.Aqiqatqa bildirgenine köre, tahqiqat, 2014 senesi mayısnıñ 3-nde olğan vaqialarnen bağlı olmağan delillerni kösterdi. Hatırlatamız, Cemilev o künü «Ermeni Bazar» keçiş noqtasında memuriy sıñırnı qanunsız keçkeninde qabaatlana.
Polozovnıñ aytqanına köre, tahqiqatnıñ delil olaraq köstergen videolar baqılğanda Mustafa Cemilevniñ memuriy sıñırnı keçkeni qayd etilmedi.
«Bugün dört diskten bir qaç video baqtıq. Anda 2014 senesi mayısnıñ adise-vaqiaları aqqında tarif etken bir qaç teleşirketiniñ levhaları, hususan ATR telekanalı ve «ZAMAN» programması bar edi. Qayd etilgen delillerde Mustafa Cemilevniñ sıñırnı keçkenine dair bir malümat yoq. Aksine, qabaatlav versiyasına köre, keçiş noqtası olğan yerde keçiş noqtası olğanını işaretlegen bir şey yoq edi. Kördik ki, Mustafa Cemilev silâlı quvetçilerden keçken insanlarnen beraber keçmek içün bir şey yapmadı», – dedi Polozov.
Advokatnıñ aytqanına köre, mahkemede «sıñırcılar çıqarğanına oşağan» video baqıldı.
«Bundan añlaşıla ki, insanlar keçiş noqtasını terk etkende Mustafa Cemilev bir yerde, vesiqalar teşkerilgen vagonçıqlar yanında qalıp, bir yerge ketmegen edi. Faqat yanına sıñır hızmetiniñ hadimleri kelgenini, vesiqaları baqılğanını ya da bir şey aytılğanını körmedik», – dep qoşta Polozov.
Bundan ğayrı, imaye tarafı bu cinaiy dava boyunca tahqiqat keçirgen tahqiqatçı Magomed Magomedovnı şaat olaraq çağırmağa niyetlene.
«Meraqlı şey: tahqiqatçı internet saifelerinden ğayrı, Mustafa Cemilev ve qorantasına qarşı aqaretlev sözlerinen izaatlarnıñ ekran resimini qoştı. Mında da meraqlı parallel bar, çünki Mustafa Cemilevniñ davasını tahqiq etken ve onı mahkemege yollağan tahqiqatçı Magomed Magomedov Mustafa Cemilevniñ oğlu Hayserniñ de davasını tahqiq etken edi. İmayeniñ suali peyda oldı: tahqiqatçınıñ Mustafa Cemilevge, qorantasına qarşı olmaq içün bir maqsadı barmı? Belki, qabaatlanğanğa nefret etken adamğa kibi baqtı? Mence, ileride bu şaatnı mahkemege çağırmağa rica etecekmiz, delillerni nasıl topladı, Mustafa Cemilevge iftira atmaq, onı yaramay taraftan köstermek içün, yani mahkeme qararına tesir etmek içün sebepleri bar edimi añlatsın», – dep ayttı Polozov.
Rusiye prokuraturasınıñ açıq izaatları yoq.
Nevbetteki mahkeme oturışuvı 2021 senesi aprelniñ 8-nde saat 9:30-da olacaq.
Qırımdaki Rusiye Tahqiqat komitetiniñ idaresi 2020 senesi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».
Hatırlatamız, qırımtatar halqınıñ milliy lideri Mustafa Cemilevniñ davası boyunca martnıñ 5-nde olıp keçken mahkeme oturışuvında imaye tarafı dava malümatlarında bozuvlarnı qayd etti. Advokat Nikolay Polozovnıñ bildirgenine köre, bozuvlar tahqiqatçı azırlağan malümatnen bağlı edi. Mahkeme oturışuvında belli olğanına köre, Cemilevniñ Qırımğa kiriş yasağı 15 yılğa – 2034 senesi martnıñ 5-ne qadar uzatıldı.
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
