Qırımtatar Milliy lideri Mustafa Cemilev "İrlandiya diplomatiya - Avropa diplomatı" neşrinden "Cesaret ile diplomatik hızmet içün" namzetliginde kösterildi. Bunı "QırımSOS" cemaat teşkilâtı haber etti.
Mukâfatlav dekabr ayında olacaq. Medalni Cemilevge şahsen berecekler.
"Mustafa Cemilevniñ qırımtatarlar arasında liderligi Ukraina Qırım yarımadasınıñ qadimiy tamır halqı - qırımtatarlarnıñ birliginiñ timsalidir. Mustafa Cemilevniñ insan aqları ve qırımtatar halqınıñ esas aqlarınıñ ilerideki mudafaası yönelişinde köstergen ğayreti ve qırımtatar cemiyetine sadıqlığı içün "Cesaret ile diplomatik hızmet içün" medal Mustafa Cemilevge şahsen berilecek", - dep yazıla bildirmede.
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
