Rusiye kontrolindeki Qırım yolbaşçısı Sergey Aksenovnıñ bildirgenine köre, Aqmescit sakinleri musluqtan aqqan kirli suvnı şikâyet etmege devam ete.
«Aqmescitte Pervomayskaya soqağında kirli suv aqa ve ilk sefer degil. Er bir qazadan soñ kil kele, bulançıq suv aqa», – dedi Aksenov noyabrniñ 30-nda suv teminlev problemlerinen bağlı toplaşuvda.
«Voda Krıma» müessisesiniñ vekili Maksim Novik, suv berüv ağlarında qazalar arttı dep bildirip, bunı «mevsimnen» bağladı.
«Bu suv borusını teşkerdik, bozuqlıqlarnı taptıq ve taqımlarımız endi çalışa. Bu aftanıñ soñuna qadar er şey tüzelecek, dep eminmiz», – dedi Novik.
Noyabrniñ başında Qırım akimiyeti Aqmescit sakinlerini ilâve tulumbalar qoyulacağı içün musluqlardan kene bulançıq suv aqacaq, dep tenbilegen edi.
Noyabrniñ 2-nde Aksenov bildirgenine köre, Aqmescit etrafında büyük suv yedekleri yoq, şunıñ içün akimiyet «daa beterine azır». Onıñ tahminlerine köre, ealige suv berüv cedveli daa eñ az bir yıl olacaq.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
