Ukraina prezidenti namzetleri Yevgeniy Murayev ve Dmitriy Dobrodomov namzetlerini keri çekmek niyetlerini bildirdiler, dep haber ete Azatlıq Radiosı.
Martnıñ 7-nde Kyivdeki matbuat konferentsiyasında Murayev Aleksandr Vilkulnıñ namzetine qoltutacağını bildirdi.
«Bu akimiyetke qarşı çıqmaq içün ğayretimizni, insanlarnı, ştablarnı, küçlerni birleştirmege azırmız», – dedi Murayev.
Onıñ aytqanına köre, ileride eki siyasetçi öz firqalarını – «Muhalifet bloku» ve «Naşı» firqasını birleştirmege planlaştıralar.
Dmitriy Dobrodomov namzetini keri çekkenini tam olaraq ilân etmedi, amma Facebookta böyle bir şey paylaştı.
«Müim bir qarar aldım! Bugün saat 17:00-de Merkeziy saylav komissiyasına barmağa planlaştıram. Kütleviy haber vastalarınıñ temsilcilerini davet etem», – dep yazdı Dobrodomov. O, diger prezident namzeti Anatoliy Grıtsenko ile fotoresim yerleştirdi.
Bundan evel Ukraina prezidenti namzeti Dmıtro Ğnap Azatlıq Radiosına bildirgenine köre, martnıñ 7-nde Merkeziy saylav komissiyasına ariza berip, öz namzetini saylavlardan keri çekti.
Martnıñ 7-si – Ukraina prezidenti namzetleri saylavlardan keri çekile bilecek soñki kündir.
Namzetini keri çekmek niyetini Serğiy Krıvonos, Dmıtro Ğnap ve Andriy Sadovıy bildirdiler.
Martnıñ 7-nde saat 15:00-ke qadar Merkeziy saylav komissiyası Krıvonos ve Sadovıynıñ arizasını qanaatlendirdi.
Martnıñ 7-nden soñ namzetini köstermekten vazgeçkenini bildirecekler prezident vazifesine namzet olıp qalacaq ve olarnıñ soyadları saylav bülletenlerinde qayd etilecek.
Martnıñ 31-nde Ukrainada prezident saylavları keçirilecek. Qırımlılar esas Ukrainada rey bere bile.
