Qırımda Rusiye polisiniñ hadimleri Qırım garnizon arbiy mahkemesiniñ binasına Rostov-na-Donu Cenübiy okrugınıñ arbiy mahkemesinde ükümleri çıqarılğan qırımlılar Zekirya Muratov ve Vadim Bektemirov içün kelgen üç vatandaş jurnalistini tuttı.
Bu aqta «Qırım birdemligi» cemaat birleşmesi haber ete.
Qayd etilgenine köre, Rusiye quvetçileri jurnalistlerniñ video tehnikasını aldı ve olarnı mahkeme oturışuvlarına kirsetmege razı olmadı.
«Jurnalistler Ali Suleymanov, Amar Abdulgaziyev ve Rustem Useinov uquq qoruyıcılar tarafından sebebi aytılmayıp tutuldı ve Aqmescitteki №3 «Merkeziy» polis bölügine ketirildi. Mühbirler Qırım garnizon mahkemesiniñ binası ögünde edi, anda eki qırımtatar siyasiy mabüsi – Zekirya Muratov ve Vadim Bektemirovğa üküm çıqarıluvda advokatlar video bağı vastasınen çıqışta bulundı», – dep aytıla haberde.
Hatırlatamız, fevralniñ 11-nde Rusiyeniñ Cenübiy okrugınıñ arbiy mahkemesi qırımlı Zekirya Muratov ve Vadim Bektemirovğa üküm çıqarmalı. Advokatlar Rusiye kontrolindeki Qırım garnizon arbiy mahkemesinden video bağı vastasınen iştirak ete.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Qurman rayonınıñ Büyük Onlar qasabasında Emil Ziyadinov, Aqmescit rayonınıñ Kurtsı qasabasında İsmet İbragimov, Bağçasaray rayonınıñ Jeleznodorojnoye köyünde Alim Sufyanov, Bağçasaray rayonınıñ Süyür Taş (Belokamenka) köyünde Seyran Hayretdinov, Bağçasaray rayonınıñ Sevastyanovka köyünde Aleksandr Sizikov, Aqmescit rayonınıñ Bavurçı (Kamenka) köyünde Vadim Bektemirov ve Aluştada Dilâver Memetovnıñ. O, tintüv keçirilgende evde degil edi, onı qıdırmağa devam eteler.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
