«Umma» Ukrayına musulmanlarının yañı müftisi olaraq Lviv ve Ğalıçına müftisi Murat Suleymanov oldı. Bu aqta 13 yıl «Umma» Ukrayına musulmanları diniy idaresiniñ müftisi olğan Said İsmagilov Facebookta bildirdi.
«O, (Murat Suleymanov – QA) – Ukrayınanıñ din erbapları arasında eñ bilgili temsilcilerinden biridir. Şeyh Murat 32 yaşında, Qırımda qırımtatar qorantasında doğdı. Balalığından İslâm dinini ögrendi. 2008 senesi Qurannı ezberlep, Hafizler mektebini bitirdi. 2013 senesi Yemen universitetiniñ şeriat iliminden mezun oldı. O yıl şeyh Murat Hodeyda şeeriniñ, Yemen, müftisi şeyh Muhammad Ahmad Amohtan hanefi uquqçılığı sertifikatını aldı. 2015 senesinden berli – Lviv şeeri musulmanlarınıñ imamı. 2016 senesinden berli – Diniy idare müftisiniñ müftisi ve Ğarbiy Ukrayınada müfti vekilidir. 2019 senesinden berli Ukrayına Fetva ve tedqiqatlar şurasınıñ azası ola. 2019 senesi Muqaddes Qurannı ögrenüv Umumukrayın birliginiñ yolbaşçısı olaraq saylandı. Ukrayınca, qırımtatarca ve arapça bile», – dep bildirdi İsmagilov.
O, yañı saylanğan müftige «Ukrayına içün bu zor vaqıtlarda qaviy ve cesür olmağa, İslâmnıñ yüksek qıymetlerini aşlamağa, Ukrayına cemiyetinde dinlerara dialog ve işbirligi yapmağa, Ukrayına musulmanları içün kerçek lider olmağa» tiledi.
Rusiyeniñ Ukrayınağa qarşı büyük istilâsı başlağanından Said İsmagilov müfti vazifesinden ayırıldı. Başta territorial mudafaağa qoşuldı, soñra cebege ketti. Şimdi İsmagilov Ukrayına Silâlı quvetlerinde hızmet ete, o, atıcı aydavcı, sağlıq hadis, yaralanğanlarnı cebeden tahliye ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
