Ukrainadaki cenkte iştirak etken 120 biñ Rusiye askeriniñ adları «Mudafaa strategiyaları merkezi» cemaat teşkilâtına belli oldı.
«Cedveldeki malümat – rusiyelilerniñ adları, tabel nomeri, askerlik yapqan yeri», – dep bildirdi cemaat teşkilâtı Facebookta.
«Mudafaa strategiyaları merkeziniñ» cedveli «Ukrayınska pravda» neşirine berildi. Qayd etilgenine köre, «MSM» malümatı işançlı menbalardan keldi.
Rusiye bu malümatnı daa izaatlamadı.
Ukraina Baş ştabınıñ malümatına köre, 5710 Rusiye askeri elâk oldı, 200 kişi esir alındı. İç işler naziriniñ mesleatçısı Vadim Denisenko martnıñ 1-nde Rusiyege Ukrainada elâk olğan askerlerniñ cesedleri kelip başladı, dep bildirdi.
Ukraina silâlı quvetleriniñ ğayıpları aqqında umumiy malümat yoq. Sumı vilâyetiniñ arbiy memuriyet yolbaşçısı Dmitriy Jivitskiy, Ohtırkada Rusiye top ateşi neticesinde onlarnen Ukraina askeri elâk oldı, dep bildirdi: «Şimdi mezarlıqlarda yer azırlaylar – elâk olğan 70 Ukraina askeri içün».
Elâk olğan vatandaşlarnıñ sayısı tam belli degil. Fevralniñ 28-nde Ukraina prezidenti elâk olğan 16 bala aqqında bildirdi. Fevralniñ 27-nde aqşam ükümet Ukrainada 352 yerli sakin elâk oldı, dep bildirgen edi.
Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti.
Prezident Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire. Başta Rusiye arbiyleri ölgenini inkâr ettiler. Amma fevralniñ 27-nde Rusiye Federatsiyası Mudafaa nazirliginiñ resmiy vekili İgor Konaşenkov Ukrainada ölgen ve yaralanğan Rusiye askerleri bar, dep ayttı. Sayısını aytmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net.
