Mudafaa tarafı "Qırım musulmanları davası"nıñ mabüsleri Aleksandr Sizikov, Alim Sufyanov ve Seyran Hayredinovğa çıqarılğan ükümni temyiz etecek ola.
"Mahkemeniñ ükmü yalıñız yekünleyici qısımda ilân etildi. Ükümniñ özüni biz beş kün içinde alacaqmız. Soñ onı temyiz etmek içün 15 künümiz olacaq. Elbette, mudafaa tarafı bu ükümni temyiz etmek niyetinde, çünki bu qararnı adaletsiz olğanından ğayrı daa tsinik dep sayamız. Yardımğa ihtiyacı olğan birici gruppa körme saqatını uzun apis cezasına mahküm etme aqılğa sığmağan şeydir", - dedi advokat.
Mayısnıñ 17-nde Rostov-na-Donudaki Rusiyeniñ Cenübiy bölgesiniñ arbiy mahkemesi "Qırım musulmanları davası"nıñ mabüsleri Aleksandr Sizikov, Alim Sufyanov ve Seyran Hayredinovğa üküm çıqardı.
Üküm qanuniy quvetini daa almağan.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Qurman rayonınıñ Büyük Onlar qasabasında Emil Ziyadinov, Aqmescit rayonınıñ Kurtsı qasabasında İsmet İbragimov, Bağçasaray rayonınıñ Jeleznodorojnoye köyünde Alim Sufyanov, Bağçasaray rayonınıñ Süyür Taş (Belokamenka) köyünde Seyran Hayretdinov, Bağçasaray rayonınıñ Sevastyanovka köyünde Aleksandr Sizikov, Aqmescit rayonınıñ Bavurçı (Kamenka) köyünde Vadim Bektemirov ve Aluştada Dilâver Memetovnıñ. O, tintüv keçirilgende evde degil edi, onı qıdırmağa devam eteler.
Martnıñ 27-nde «Qırımlı musulmanlar davasınıñ» mabüsi Aleksandr Sizikov Bağçasaray merkeziy rayon hastahanesiniñ nevrologik bölügine alındı.
Rusiye Federatsiyasınıñ Cenübiy okrugınıñ arbiy mahkemesinde Rusiye devlet qabaatlavı «qırımlı musulmanlar davasınıñ» mabüsi Aleksandr Sizikovnı 18 yılğa, daa eki qırımlı – Alim Sufyanov ve Seyran Hayredinovnı 14 yılğa azatlıqtan marum etmege talap ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
