338 deputat «ebet» dep rey berdi.
Jeleznâk bildirgenine köre, yañı nazir prezidentsiz tayin etildi, Umerovnıñ namzetini parlamentte prezident vekili olğan Fedir Venislavskıy taqdim etti.
Parlamentniñ milliy telükesizlik, mudafaa ve istihbarat komiteti Rustem Umerovnıñ mudafaa naziri vazifesine tayin etilmesine qoltuttı. Komitet Umerovnıñ namzetine bir ağızdan qoltuttı, dep haber etile.
Halq deputatı olaraq saylanmazdan evel yañı nazir qırımtatar halqınıñ lideri Mustafa Cemilevniñ mesleatçısı edi. Bundan ğayrı, Umerov eki kere Qırımtatar Milliy Qurultayınıñ delegatı olğan edi.
Sentâbrniñ 5-nde Yuqarı Rada mudafaa naziri Oleksiy Reznikovnı ve Rustem Umerovnı Devlet mülki fondunıñ yolbaşçısı vazifesinden çıqardı.
Ukrayına prezidenti Volodımır Zelenskıy memleketniñ mudafaa nazirini deñiştirmek niyetini tasdıqladı. O, nazirniñ em arbiylernen, em umumen cemiyetnen munasebetleriniñ yañı şekilleri kerek, dep ayttı. Oleksiy Reznikov yerini Devlet mülki fondunıñ yolbaşçısı Rustem Umerov almalı. Prezident parlament bu namzetke qoltutar, dep bekley.
Bu qarar müessisedeki ve nazirniñ emrinde olmağan arbiy komissarlıqlar sistemasındaki qabarcılıq qavğalarından soñ seslendirildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
