Moskvanıñ merkezinde cumaertesi künü, noyabrniñ 7-nde, Rusiye apishanelerinde tutulğan ukrainalılarğa, hususan qırımlılarğa qol tutuv bir kişilik narazılıq aktsiyaları olıp keçti. Bu aqta Rusiye faali Olga Mazurova Facebookta bildirdi.
Faallerniñ qollarında Rusiye akimiyeti tutqan qırımlılarnıñ adları ve fotoresimleri ve «Qırımtatarlar Rusiye apishanelerine sürgün etilmesin», «Soqur «terrorist», I derece saqatı Aleksandr Sizikov – Rusiye «adaletiniñ» haberleri», «Adaletsiz taqip etilgenler – acımız budır: Rusiyedeki ukrainalı siyasiy mabüsler» ve diger yazuvlı şiarlarını tuttı.
«Kün-künden Rusiyede siyasiy mabüslerniñ sayısı arta… Bu sanki adiy bir şey kibi oldı… Bu nasıl ola bile? Mence, şimdi Qırımda pek qorqunç şeyler ola. Tasil alğan, çalışqan ve ailesi olğan onlarnen er adamı terrorist manaçığınen apiske alına ve büyük apis cezalarını ala… Birinci, ekinci derece saqatları «terrorist» dep ilân etile…», – dep yazdı Mazurova.
Onıñ aytqanına köre, bu sefer bir kişilik narazılıq aktsiyaları «bayağı raat keçti, insanlar keçip soray edi, fotoresim çıqara ediler».
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
Aq qorçalayıcılar ve advokatlar bu cinaiy davalarnı siyasiy, milliy ya da diniy sebeplerden taqip dep adlandıra. Rusiye akimiyeti bu sebeplerni inkâr ete.
