Aqyarda sekizinci koronavirus hastası qayd etildi, dep bildirdi şeerniñ Rusiye yolbaşçısı vazifelerini eda etken Mihail Razvojayev jurnalistlerge.
«Adam Moskvadan qayttı, kimsege aytmadı, neticede esli-başlı anasına yuqturdı, o, yuqunç hastahanesinde buluna. Onı yüksek sıcaq ve keskin nefes virus yuqunçı alâmetlerinen hastahanege alğanlar. Onı özüni bugün saba politsiyanen tapqanlar. Onıñ da bu talili tasdıqlanacaqtır», – dedi Razvojayev.
Hastanen yaqından alâqada olğan altı insan yuqunç hastahanesine alındı, talilleri alına.
Ekinci kontakt gruppasına kirgen daa 10 kişi özüni izolâtsiya etüv rejiminde buluna.
Aprelniñ 14-nde saba koronavirus hastalığı sebebinden 606 insan ekimlerniñ közetüvi altında buluna.
Aqyarda vatandaşlar özüni izolâtsiya etüv rejimini bozğanları içün 24 protokol tizildi. Rusiye mahkemesi memuriy davalardan biriniñ qararını bu afta çıqarmağa niyetlene.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
