«Strategiya-18» Rusiye teşebbüsiniñ faalleri narazılıq aktsiyalarına çıqıp, Rusiye ve işğal etilgen yarımadanıñ apishanelerinde tutılğan qırımlı siyasiy mabüslerni azat etmege talap ettiler. Eki aktsiya Moskvada Rusiye prezidentiniñ memuriyeti örgünde ve Lubânskaya meydanında keçirildi.
Teşebbüs azası Vera Lavreşinanıñ Qırım.Aqiqatqa bildirgenine köre, faallerniñ qollarında siyasiy mabüslerniñ adları ve şahsiy ikâyeleri ile yazuvlı şiarlar bar edi.
«Memuriyet ögünde insanlar bazı vaqıtları bir saat turalar, suvuq olsa – yarım saat. Solovetskiy taşı yanında yarım saat turdıq, anda suvuq yel esti, amma bu provokatorlar ve politsiyağa telefon etmege başlağan vatandaşlar kibi qorqunç degil… 30-40 daqqadan ketmege tırıştıq, çünki «musafirler» kelecegini bekley edik», – dep tarif etti Lavreşina Qırım.Aqiqatqa.
Ukraina Yuqarı Radası reisiniñ birinci muavini İrına Geraşçenko bildirgenine köre, Ukraina, Rusiyede ve işğal etilgen Qırımda tutılğan ukrainalı reine ve siyasiy mahkümler azat etilsin dep, Ukraina devletine qarşı cinayet işlegen 60 Rusiye vatandaşını bermege azır.
Aq qorçalayıcılarnıñ malümatına köre, tahminen 60 Ukraina vatandaşı Rusiyede ve işğal etilgen Qırımda siyasiy sebeplerden azatlıqtan marum etildi. Ukraina Tış işler nazirligi, Rusiyege 300 kerege yaqın narazılıq bildirip, anda olğan ukrainalılarnı azat etmesini talap etken edi.
