Moskvadaki istinaf mahkemesi, "casuslıq" davasında 10,5 yıl apis cezasına maküm etilgen Herson faali İrına Gorobtsovanıñ şikâyetini red etti. Bu aqta onıñ babası Volodımır Ğorobtsova "Supilevne"ge bildirdi.
Onıñ aytqanına köre, saban ayınıñ 31-nde makeme toplaşuvı olıp keçti, mında İrınanıñ şikâyeti baqıldı. Amma makeme ükümni deñiştirmedi. Çeçek ayınıñ 10-na qadar qadın Moskvada bulunacaq, bundan soñ onı Aqmescitteki tahqiqat izolâtorına etap etecekler.
"Anda bir ay devamında, belki daa çoq, onı ne yerge yollamaq kerek olğanına dair qarar alınacaq. İrına da bu makeme oturında bar edi. Dava Moskvanıñ istinaf makemesinde baqıldı, makeme qarar şikâyet tışında qala, dep bildirdi. Şimdi deñişim aqqında ariza yazacaqmız", — dep bildirdi Volodımır Ğorobtsov.
Onıñ aytqanına köre, İrına 20 kilogram azğan. "Amma mektüplerde ruhtan tüşmegenini yazğan edi", — dedi o.
İrına Ğorobtsova hersonlı aq qorçalayıcı ve cemaat faali. 2022 senesi saban ayında şeer Rusiye ordusı tarafından işğal etilgen soñ, o, tibbiy hadimlerge yardım etmege başladı. Qadın Rusiye Federatsiyasınıñ arbiyleri tarafından zorbalıqqa oğrağan yerli sakinlerge sağlıq saqlav aqqını yerine ketirüvde yardım ete edi. İçtimaiy ağlarda Ğorobtsova işğalge qarşı barışıq aktsiyaları ve şeerdeki yaşayış tecribesi aqqında tarif ete edi.
2022 senesi quralaynıñ 13-nde Ğorobtsovanıñ tuvğanları, ana-babasınen yaşağan evine saba "Z" işaretli eki maşna kelhenini haber etken edşiler. Rusiye arbiy urbasında bir qaç adam evge basıp kirgen ve qadınnı zornen maşnağa oturttıp alıp ketkenler.
2024 senesi saban ayında Rusiye Federatsiyası kontrol etken makeme Ğorobtsovnı casuslıq davasında 10 yıl 6 ayğa azatlıqtan marum etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
