Link açıqlığı

Saatnıñ esas haberi

Moskvadaki mahkeme Qırım yalısında zapt etilgen sekiz ukrainalı askerni apiste qaldırdı


Zapt etilgen ukrainalı askerler Moskva şeer mahkemesinde, 2019 senesi yanvar ayı
Zapt etilgen ukrainalı askerler Moskva şeer mahkemesinde, 2019 senesi yanvar ayı

Moskva şeer mahkemesi Qırım yalısında zapt etilgen ukrainalı askerler Denis Gritsenko, Andrey Draç, Vâçeslav Zinçenko, Mihail Vlasük, Bogdan Nebılitsa, Yuriy Bezyazıçnıy, Yuriy Budzılo ve Sergey Çulibanıñ imaye şikâyetlerini red etip, olarnı apiste qaldırdı. Bu aqta «İnterfaks» Rusiye haber agentligi bildirdi.

Oturışuv qapalı şekilde keçirildi.

Daa evel Moskva şeer mahkemesi ukrainalı askerler Yevgeniy Semidotskiy, Andrey Oprısko, Roman Mokrâk ve Sergey Tsıbizovnıñ advokatları bergen itiraz arizalarını red etti.

Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.

Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».

Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.

Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.

Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.

XS
SM
MD
LG