Moskvanıñ Lefortovo mahkemesi devlet hainliginde qabaatlanğan Aqyar sakini Galina Dolgopolayanıñ apis müddetini uzattı, dep haber ete Qırım aq qorçalayıcı gruppası Rusiye kütleviy haber vastalarına esaslanıp.
Qayd etilgenine köre, Dolgopolaya daa üç ay, 2020 senesi iyülniñ 27-ne qadar, apiste qalacaq.
Al-azırda Dolgopolaya ya da advokatları tarafından bu malümat tasdıqlanmadı.
Hatırlatamız, daa evel Moskvanıñ Lefortovo mahkemesi Dolgopolayanıñ apiste tutuv müddetini 2020 senesi aprelniñ 27-ne qadar uzattı.
2019 senesi noyabr ayınıñ soñunda Rusiye Federal telükesizlik hızmeti işğal etilgen Aqyarda Ukraina Mudafaa nazirligi içün istihbarat yapqanından şübheli sayılğan qadın yaqalandı, dep bildirdi. Daa evel belli olğanına köre, devlet hainligi davası aynı maddege istinaden Rusiyeniñ Cenübiy arbiy okruşınıñ arbiyine qarşı açıldı.
