Rusiyeniñ paytahtı Moskvada «Strategiya-18» Rusiye teşebbüsiniñ faalleri Rusiye ve işğal etilgen Qırımda siyasiy sebeplerden tutulğan Ukraina vatandaşlarını azat etmek talabı ile bir kişilik narazılıq aktsiyaları keçirildi. Mında 2018 senesi noyabr ayınıñ soñunda Qırım yalısında FSB tarafından zapt etilgen ukrainalı arbiyler, ukrainalı rejissör, siyasiy mabüs Oleg Sentsov, qırımlı Volodımır Baluh, qırımtatar faalleri aqqında aytıldı.
Rusiye faali Vera Lavreşina Qırım.Aqiqatqa bildirgenine köre, «Strategiya-18» teşebbüsiniñ iştirakçileri Pâtnitskaya soqağında ve Bolşaya Ordınkada bir kişilik narızılıq aktsiyalarını ötkerdi. Umumen narazılıq aktsiyaları tınç keçti, amma keçken insanlardan biri «Qırım Ukrainağa qaytacaq» yazısını ukraince körip, sert cevap berdi.
«Artıq siyasiy sebeplerden tutulğanlar o qadar çoq oldı ki, er kesni aytıp keçmege imkânsız. Çoqusı – «ekstremist» ve «terroristler». Elbette, normal insanlar bu davalar uydurılğanını añlay, ve Rusiye FSBsi eñ namuslı, eñ işkir, eñ sevimli ve eñ çoq sevgen aqaylarnı ve babalarnı apiske yollay, ğaliba. Ve er kün quvetçiler kelip, yañı insanlarnı – eñ yahşı soylarını – apiske ala. Bu insanlar içün yapa bilecegimiz tek bir şey – olarnıñ qabaatsız olğanını israr etip, olar azat etilmeli, dep aytmaq kerekmiz», – dedi Lavreşina.
Sankt-Peterburg ve Moskvada yaşağan Rusiye faalleri «Strategiya-18» müddetsiz aktsiyasına birleşken edi. Bu ad 1944 senesi mayısnıñ 18-nde olğan qırımtatar sürgünliginiñ künü ile bağlıdır. Er aynıñ 18-nde faaller soqaqlarğa çıqıp, işğal etilgen Qırım vaziyetini, insan aqları bozulğanını tarif eteler.
Aq qorçalayıcılarnıñ malümatına köre, tahminen 60 Ukraina vatandaşı Rusiyede ve işğal etilgen Qırımda siyasiy sebeplerden azatlıqtan marum etildi. Ukraina Tış işler nazirligi, Rusiyege 300 kerege yaqın narazılıq bildirip, anda olğan ukrainalılarnı azat etmesini talap etken edi.
Rusiyedeki siyasiy mabüslerniñ sayısı 230-dan ziyade oldı. Vladimir Putin yolbaşçılığında akimiyet yañı yaşayış saalarını cinaiy taqipke oğratmaq içün yañı-yañı qanunlar kirsete. Bu hulâsa Perseus Stategies Washington uquq şirketiniñ bazarertesi künü aydınlatqan maruzasında qayd etile. Onıñ tizilmesinde bir sıra aq qorçalayıcı teşkilât, şu cümleden «Memorial» Rusiye aq qorçalayıcı merkezi iştirak etti.
