Rusiyeniñ paytahtı Moskvada, Qırım köpründe, "Qırım musulmanları davası" figurantı, I gruppa körme saqatı Aleksandr Sizikovnıñ Rusiye mahkemesi tarafından 17 yılğa azatlıqtan marum etilmesine üküm etilgenine qarşılıq köstermek içün bir kişilik narazılıq aktsiyası keçirildi.
Piketni "Yımşaq küç" cemiyet-siyasiy qadın areketiniñ kör faali keçirdi
"Men bellesem, böyle bir vaziyette içtimaiy ağlar içtimaiy vaziyetni yahşılaştıra bile. Men özüm kör bir insan olaraq, anda olğan izolâtsiya derecesine köre çılğın olur edim, dep tüşünem. Onıñ içün bu ikâyeni insanlarnen paylaşmaq müim", — dep ayttı faal areketniñ Telegram kanalında derc etilgen videoda.
Sentâbr 14-te aqşam Sizikovnı eşyalarını toplamağa bermey, Bağçasarayğa alıp kettiler, dep tarif ete onıñ anası Yelena. Sentâbrniñ 19-na keçken gecesi onı 1-nci SİZO-ğa avuştırğanlar.
Aq qorçalayıcılarnıñ qayd etkenine köre, Rusiye qanunlarına binaen, körüvni bütünley ğayıp etken insanlarnı tüzetüv müessiselerinde apis cezasından azat etmek kerek. Amma Rusiye mahkemesi Aleksandr Sizikovnı ceza izolâtorında bulunmaq aqqına malik insan olaraq tanıdı.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Emil Ziyadinov, Zekirya Muratov, İsmet İbragimov, Alim Sufyanov, Seyran Hayredinov, Vadim Bektemirov mahkemede apiske alındı ve Aqmescitniñ ceza izolâtorına qapatıldı. I derece köz saqatı olğan Aleksandr Sizikov ev hapsine yollanıldı. Tutulğanlar Rusiyede yasaqlanğan «Hizb ut-Tahrir» diniy teşkilâtınen alâqaları bar olğanında qabaatlandı.
2023 senesi mayıs ayında Sizikov ilk dört yılnı apishanede keçirecek 17 yılğa üküm etildi. 2024 senesi sentâbrniñ 13-nde Rusiye Federatsiyasınıñ istinaf arbiy mahkemesi qırımlınıñ ükmüni deñiştirmedi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
