«Strategiya-18» Rusiye teşebbüsiniñ faalleri apiske alınğan qırımtatarlarğa qoltutmaq ve rusiyelilerge Rusiye tarafından Qırımnıñ işğal etilüvi aqqında hatırlatmaq içün martnıñ 18-nde aqşam Moskvanıñ soqaqlarına yazuvlı şiarlar ve bir kişilik narazılıq aktsiyalarınen çıqtı. Aktsiyanıñ iştirakçileri, koronavirus yuqunçınıñ tarqaluv telükesi bar olğanına dair malümat aydınlatılğan soñ Rusiye paytahtınıñ soqaqları bayağı boşaldı, dep qayd etti, dep ayttı aktsiya iştirakçisi Vera Lavreşina Qırım.Aqiqatqa.
«İnsanlar yedek etip mahsulat ala, soqaqlarğa aşç çıqa, bir çoq avtobus aqşam üstü boş kete. Acayip deñişmeler ola! Yaqında «Qırımnıñ Rusiyege qoşuluv künü» tantanalı sürette qayd etildi, amma vaqıt keçkeninen quvanç eksildi. Qırımda, elbette, bir şeylerk yeçirile, amma panikağa dalğan Moskoviyada endi bayram is etilmey… Adet üzre Piter ve Moskva bu künü qırımtatar halqına qoltutuv aktsiyasını keçire. Bütün Kreml ukrain, qırımtatar reineleriniñ azat etilüvini bekleymiz», – dedi Lavreşina.
Mart başından berli Qırımda koronavirus yuqunçınıñ tarqaluv riskini eksiltmek içün tedbirler alına, martnıñ 17-nden başlap kütleviy tedbirlerniñ keçirilüvi yasaqlana. Tenbilerge baqmadan, Qırımda işğalniñ altı yılı munasebetinen merasimler keçirildi ve Rusiye prezidenti Vladimir Putin qarşılandı.
Ukraina Tış işler nazirligi, Putinniñ işğal etilgen yarımada ziyaretine qarşı narazılığını bildirdi. Ukrainanıñ BM missiyası Putinniñ Aqyar ziyaretini de takbih etti.
Sankt-Peterburg ve Moskvada yaşağan Rusiye faalleri «Strategiya-18» müddetsiz aktsiyasına birleşken edi. Bu ad 1944 senesi mayısnıñ 18-nde olğan qırımtatar sürgünliginiñ künü ile bağlıdır. Er aynıñ 18-nde faaller soqaqlarğa çıqıp, işğal etilgen Qırım vaziyetini, insan aqları bozulğanını tarif eteler.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
