Rusiye iqtisadiyat inkişafı nazirligi diger Rusiye organlarınen beraber «Qırım ve Aqyarnı suvnen temin etüv planınıñ leyhasını azırladılar». Bu aqta çarşenbe künü Qırım «kuratorı» olaraq tayinlengen Rusiye ükümetiniñ reis muavini Marat Husnullin jurnalistlerge bildirdi.
«Qırımda suv teminatı meselesi kün tertibimizniñ esas meselelerinden biri ola, regionnıñ bütün sakinleri suvnen temin etilsin dep, onı operativ şekilde al etmeli. Keçken afta bir sıra mesleat keçirdik, olarnıñ neticesinde Qırım ve Aqyarnı suvnen temin etmek içün tedbir planını azırlamağa vazife berdim. Plan leyhası İqtisadiyat inkişafı nazirligi ve federal icra akimiyetniñ diger organları tarafından azırlandı ve ükümet meydançığına çıqarıldı», – dep ayttı Husnullin, dep haber ete TASS.
Onıñ bildirgenine köre, eñ yaqın vaqıtta leyha meraqlı taraflarnen keliştirilecek, tüzetilecek ve para menbaları belgilenecek.
Husnullin Tabiat nazirligine ve Rosgeologiyağa Qırımğa vekillerini yollap, geologik qıdıruv işlerini keçirmege emir etti.
Sentâbrniñ 7-nden itibaren Aqmescitte, Bağçasaray ve Aqmescit rayonlarında qurğaqlıq ve suv anbarlarında suv azlaşqanı sebebinden suv berüv sıñırlarınıñ üçünci, eñ sert etapı başlatıldı.
Qırımnıñ Rusiye ükümeti bildirgenine köre, yarımadanıñ suv teminatı ile «eñ yaramay stsenariyge» azırlanalar. Kreml kontrolindeki Qırım yolbaşçısı Sergey Aksenovnıñ bildirgenine köre, Rusiye Qırımnıñ suv teminatı vaziyeti fevqulâde olğanını tanıy. O, 2020 senesi 150 yıl içinde eñ quru oldı, dep bildirdi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
