Link açıqlığı

Saatnıñ esas haberi

Moskvada faaller qırımtatarlarğa ve siyasiy mabüslerge qoltutmaq maqsadınen narazılıq aktsiyalarını keçirdi


Moskva, «Strategiya-18», arhiv fotoresimi
Moskva, «Strategiya-18», arhiv fotoresimi

Moskvada noyabrniñ 18-nde «Strategiya-18» teşebbüsiniñ faalleri bir kişilik narazılıq aktsiyalarını ötkerdi. Aktsiya iştirakçileri Moskvanıñ merkeziy soqaqlarına siyasiy mabüslerni deñiştirmek, Qırımnı azat etmek ve qırımtatarlarğa qarşı basqı toqtatmaq talabınen çıqtı.

«Pâtnitskaya soqağından başlap, Tretyakov galereyasına kettik. Müddetsiz narazılıqçı dostlarımızğa. Bizni Kirill Kotov davet etti. Sentsovnıñ cedvelinden ukrainalı esirlerniñ azatlığı içün Moskvanıñ farqlı soqaqlarında er kün narazılıq aktsiyaları ötkerile. Provokatorlar da keldi. Olar politsiyanı çağırğanlar. Kimse tutulmadı», – dep tarif etti Qırım.Aqiqatqa Rusiye faali Vera Lavreşina.

Tretyakov galereyası yanındaki aktsiya vaqtında faal Kirill Kotov Qırımda basqığa oğrağan ayrı insanlarğa diqqatnı celp etti.

«İkâyesini tarif etmege tırışqanımız insan Emir-Üsein Kuku oldı. Cemaat faali, aq qorçalayıcı. 2016 senesi onı Rusiyede yasaqlanğan «Hizb ut-Tahrir» siyasiy islâm teşkilâtınen alâqaları bar olğanında qabaatladılar», – dep yazdı Kotov Facebookta.

Rusiye prezidentiniñ memuriyeti ögünde Areket 14: faalleriniñ aktsiyası olıp keçti. Narazılıq aktsiyasınıñ iştirakçileri ukrainalı rejissör Oleg Sentsovnıñ azat etilmesini talap etip, rusiyeli ve ukrainalı esirlerni deñiştirmege çağırdılar.

İyün ayında keçirilgen bunıñ kibi bir kişilik narazılıqlardan soñ Moskvada dört faal tutıp alınğan edi.

Sankt-Peterburg ve Moskvada yaşağan Rusiye faalleri «Strategiya-18» müddetsiz aktsiyasına birleşken edi. Bu ad 1944 senesi mayısnıñ 18-nde olğan qırımtatar sürgünliginiñ künü ile bağlıdır. Er aynıñ 18-nde faaller soqaqlarğa çıqıp, işğal etilgen Qırım vaziyetini, insan aqları bozulğanını tarif eteler.

Aq qorçalayıcılarnıñ malümatına köre, tahminen 70 Ukraina vatandaşı Rusiyede ve işğal etilgen Qırımda siyasiy sebeplerden azatlıqtan marum etildi. Ukraina Tış işler nazirligi, Rusiyege 300 kerege yaqın narazılıq bildirip, anda olğan ukrainalılarnı azat etmesini talap etken edi.

XS
SM
MD
LG