Sentâbrniñ 18-nde Moskvada Rusiye prezidentiniñ memuriyeti ögünde faaller qırımlı siyasiy mabüslerge qoltutmaq maqsadınen bir kişilik narazılıq aktsiyalarını keçirdi. Olar açlıq tutqan Oleg Sentsov, Vladimir Baluh ve siyasiy sebeplerden apiste tutulğan diger qırımlılarnıñ azat etilmesi ve Qırım işğaliniñ toqtatılmasını talap etti.
Bunı «Strategiya-18» Rusiye teşebbüsiniñ iştirakçisi Vera Lavreşina Qırım.Aqiqatqa aytıp berdi.
«Rusiye vatandaşları yavaş-yavaş uyana, özüne keleler. Şimdi pensiyalarını alalar, işsiz qaldıralar. Aman-aman er kün insanlar narazılıq aktsiyalarına çıqa. Şimdilik pek çoq degil», – dep qayd etti faal.
İyün ayında Moskvada keçirilgen bir sıra bir kişilik narazılıq aktsiyalarından soñ dört faal tutulğan edi.
Sankt-Peterburg ve Moskvada yaşağan Rusiye faalleri «Strategiya-18» müddetsiz aktsiyasına birleşken edi. Bu ad 1944 senesi mayısnıñ 18-nde olğan qırımtatar sürgünliginiñ künü ile bağlıdır. Er aynıñ 18-nde faaller soqaqlarğa çıqıp, işğal etilgen Qırım vaziyetini, insan aqları bozulğanını tarif eteler.
Aq qorçalayıcılarnıñ malümatına köre, tahminen 70 Ukraina vatandaşı Rusiyede ve işğal etilgen Qırımda siyasiy sebeplerden azatlıqtan marum etildi. Ukraina Tış işler nazirligi, Rusiyege 300 kerege yaqın narazılıq bildirip, anda olğan ukrainalılarnı azat etmesini talap etken edi.
