2022 senesiniñ soñunda Rusiyede keçirilgen seferberlik Moskvanıñ cenki yaqın vaqıtta bitirmek istemegenini köstere. Bunı NATO Baş kâtibi Yens Stoltenberg Radio 4 World at One yaynında bildirdi.
"Bu daa çoq devam etecegine azır olmaq kerekmiz, çünki körgeniñiz kibi RF esas maqsadından - Ukrayinanıñ bütünley zapt etmek isteginden vazgeçmek niyetinde degil", - dedi o.
Ukrayina ordusınıñ muvafaqiyetleri Kıyiv içün yaqın bir zafer olğanına dair aldatıcı bir is yaratmamaq kerek, dep saya Alyansnıñ baş kâtibi.
"Ukrayina ordusı bir qaç aydan berli qarşı ücümge keçtiler, amma Rusiye de seferberlik keçirip öz sıralarını arttırdı. Seferber etilgenlerniñ çoqusı şimdi talimlerde. Bütün bu, olar cenki devam etmege ve belki de yañı ücümge azırlanğanlarını köstere", - dedi o.
"Cenklerniñ çoqusı barışıq aytışuvlarnen bite. İhtimal ki, mında da aynı olacaq. Amma Ukrayina içün barışıqnıñ başlanacağı şartlar bütünley küreş meydanında quvetlerniñ nisbetine bağlı olğanını bilemiz", - dep qayd etti NATO baş kâtibi.
Ukrayinlerniñ mutlaq ekseriyeti (89%) bütün işğal etilgen topraqlarnıñ azat etilecegine eminler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
