Rusiye ve Ukraina bıltır ilhaq etilgen Qırım yalısı yaqınlarında zapt etilgen ukrainalı deñizcilerni deñişüv meselesini muzakere etmeyler. Bu aqta Rusiye prezidentiniñ matbuat kâtibi Dmitriy Peskov iyülniñ 17-nde jurnalistlerge ayttı.
«Yoq, ukrainalı deñizcilerniñ deñişüvi muzakere etilmey», – dep bildire Peskovnıñ aytqanlarını TASS Rusiye agentligi.
Onıñ hatırlatqanına köre, bu mesele Rusiye ve Ukraina liderleri Vladimir Putin ve Volodımır Zelenskıynıñ telefon subeti vaqtında laf etildi, şu sebepten de kün tertibinde qala.
İyülniñ 17-nde Moskvada 24 ukrainalı deñizciniñ apis müddetini uzatuv mahkemeleri keçirile. Anda Ukraina ombudsmeni Lüdmila Denisova buluna. O, Ukraina Rusiye ile esirlerni deñişmege azır olğanını bildirdi.
Ukraina Tış işler nazirliginiñ malümatına köre, Rusiye 70-ten ziyade ukrainalını qanunsız alda tuta. Olarnıñ arasına 2018 senesi noyabr ayında Qara deñiz yalısı yaqınlarında Rusiye tarafından zapt etilgen 24 ukrainalı deñizci ve Donbastaki esirler kirmemekte.
2018 senesi noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
