«Strategiya-18» Rusiye teşebbüsiniñ faalleri ve bir sıra ABD faali narazılıq aktsiyalarını keçirip, Rusiye reberliginden Suriye ve Ukrainada cenkni toqtatmasını, işğal etilgen Qırımdan ketmesini ve yarımadanıñ qırımtatar ealisine qarşı basqı toqtatmasını talap etti. Narazılıq aktsiyaları yanvarniñ 21-nde Moskvada Arbatta, em de Chicago, Arlington, San Diego ve Bayonnede keçirildi, dep bildirdi aktsiyanıñ iştirakçisi Vera Lavreşina Qırım.Aqiqatqa.
«Suriyedeki cenkke qarşı narazılıq aktsiyalarına çıqtıq, amma Ukrainanı da aytamız, ayrıca – Qırımnı. Tünevin Chicago ile bir aktsiya oldı. Eski dostlarımız, «Strategiya-18» qoltutuv rus yazuvlı şiarınen ve Ukrainadaki cenkke ve Qırım işğaline qarşı çıqtılar. ABDde narazılıq aktsiyaları ilk sefer olmay. Narazılıq aktsiyası Martin Luther Kingniñ doğğan kününe, yani er angi ayırımğa qarşı bağışlandı», – dep tarif etti Lavreşina.
Onıñ qayd etkenine köre, ABDde böyle narazılıq aktsiyaları raat keçe ve uquq qoruyıcılarnıñ diqqatını çoq celp etmey. Aynı vaqıtta Moskvada teşebbüs gruppası narazılıq yerini terk etmege mecbur oldı, çünki politsiya olarnı közetti, çoqusı allarda faaller tutula, dep ayttı Lavreşina.
Sankt-Peterburg ve Moskvada yaşağan Rusiye faalleri «Strategiya-18» müddetsiz aktsiyasına birleşken edi. Bu ad 1944 senesi mayısnıñ 18-nde olğan qırımtatar sürgünliginiñ künü ile bağlıdır. Er aynıñ 18-nde faaller soqaqlarğa çıqıp, işğal etilgen Qırım vaziyetini, insan aqları bozulğanını tarif eteler.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
