Sentâbrniñ 10-na keçer gecesi Rusiyege bir qaç regionda dronlar ücüm etti, dep haber ete yerli akimiyet.
Hususan, Moskva şeer yolbaşçısı Sergey Sobânin öz Telegram kanalında Moskva vilâyetinde - Podolsk, Ramenskoye, Lübertsı, Domodedovo ve Kolomnada dronlarnıñ yoq etilgenini ayta.
Memurnıñ bildirgenine köre, Ramenskoyede dron parçaları mesken evge tüşti. Moskva tarafına Kaşirskoye şosse qapatıldı.
«Ramenskoye şeerinde ücüm keri qaytarılğanda evniñ 11-12-nci qatları seviyesinde yanğın çıqtı, acele hızmetler çalışa. Urulğan uçucısız parçalarınıñ tüşme aqibetleri Jukovskiy ava limanında da yoq etile», – dep aytıla haberde.
Moskva vilâyetiniñ valisi Andrey Vorobyev Ramenskoye şeerine qarşı dron ücümi neticesinde bir adam elâk olğanını, üç adam yaralanğanını bildirdi. 9 yaşında balanıñ ölümi aqqında paylaşılğan malümat tasdıqlanmadı.
Region başınıñ bildirgenine köre, elâk olğan 46 yaşında qadın edi. Baza öz menbalarına esaslanıp, yazğanı kibi, onıñ adı Zinaida. Qadınnıñ boyu qısqa edi ve başta operativ hızmetlerniñ hadimleri onı bala dep yañlış añlağanlar.
«Alınğan malümatqa köre, Sportivnıy proyezddeki evde üç kişi yaraladı. Episi Ramenskoye hastahanesine alındı», – dep qayd etti Vorobyev.
Rusiye Telegram kanalları tüşürilgen dron parçaları olğan yerden foto ve video derc ete.
Brânsk vilâyetine ücüm aqqında vali Aleksandr Bogomaz ilân etti. O, 21 dronnıñ yoq etilgeni aqqında haber etti.
Rusiye Federatsiyasınıñ Tula vilâyetinde yerli akimiyet ava mudafaa küçleri eki dronnı yoq etti, amma uçucısıznıñ parçaları yaqarlıq-energetika kompleksiniñ obyektlerinden birine tüşti, dep bildire.
Soñki ayları Kyiv Rusiye toprağına avadan ücümlerini quvetleştirip, maqsadı Moskvanıñ cenk ğayretleri içün esas olğan infrastrukturanı yoq etmek ve Rusiyeniñ Ukrayinağa qarşı darbelerine cevap bermek ola, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
