İyülniñ 24-nde saba eki uçucısız cihaz Moskvağa ücüm etti. Bu aqta şeer yolbaşçısı Sergey Sobânin bildirdi. Ciddiy zarar yoq, kimse yaralanmadı, dep bildire Moskva akimiyeti.
Uçucısızlardan biri şeer merkezine yaqın Komsomolskiy caddesi rayonında tüşti, №17 ev zarar kördi, dep haber etti Rusiye TASS agentligi acele hızmetlerdeki menbasına esaslanıp. Bu yerge yaqın Frunzenskaya yalı kenarında Rusiye Mudafaa nazirliginiñ binası buluna.
«112» Telegram kanalı bildirgenine köre, eki qatlı binada dam zarar kördi, qarşıdaki evde birinci qatta olğan tükânnıñ ve dördünci qatnıñ camları qırıldı. Qomşu evde de «camlar zarar kördi».
Bellingcat leyhasınıñ tahqiqatçı jurnalist Hristo Grozev qayd etkenine köre, dron tüşken Komsomolskiy caddesindeki adres «Baş istihbarat idaresi kiberordusınıñ merkeziy ofisi qarşısında» buluna. Anda Arbiy universitet ve Baş istihbarat idaresiniñ bir qaç gizli obyekti bar.
«Ukrayına bu binalarğa ücüm etken olsa, Mudafaa nazirligi ve Baş istihbarat idaresi içün timsaliy zarar pek tesirli olacaq», – dep tüşüne o.
Lihaçev caddesinde de areket qapatıldı, TASS malümatına köre, uçucısız Leroy Merlin levhası olğan biznes merkezine ücüm etti. Binanıñ 17-nci ve 18-inci qatlarında camlar qırıldı. «Yandeks.Haritalar» malümatına köre, laf №15 ev aqqında kete. Anda şirket tükânı bar.
Rusiye Mudafaa nazirligi Ukrayınanı qabaatladı. Müessise eki Ukrayına dronı radioelektron küreş vastalarınen yoq etildi, dep bildire. Ukrayına arbiyleri Moskvağa qarşı ücüm malümatlarını izaatlamağan edi.
RBK-Ukraina neşiri mahsus hızmetlerdeki menbalarına esaslanıp, laf Ukrayına Baş istihbarat idaresiniñ operatsiyası aqqında kete, dep bildire. «Bütün quşlar Moskvağa uçıp bardı», – dep bildire neşir subetdeşiniñ aytqanlarını. O, angi obyektler ücümniñ nişanları edi, aytmadı.
Keçken sefer uçucısızlar Moskva merkezine mayısta ücüm etken edi. Eki kiçik dron Kremlge yetip, Senat sarayınıñ qubbesine uruldı. Uçucısız Yañı Moskvadaki binağa da ücüm etti, dronlardan biri ise Rublevsköy şossede tüşürildi, dep haber etildi.
İyülniñ 4-nde Moskva akimiyeti bir qaç uçucısız Yañı Moskvada tüşürildi, dep bildirdi. Ukrayına ücümlerge alâqası olğanını resmiy şekilde bildirmegen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
