Moskva sakinleri Rusiyeniñ Qırım ilhaqına qarşı bir kişilik narazılıq aktsiyalarına çıqtı, dep bildirdi rusiyeli cemaat faali Konstantin Kotov Qırım.Aqiqatqa.
Onıñ aytqanına köre, narazılıq aktsiyaları Moskvanıñ merkezinde keçirildi. Olarnıñ iştirakçileri qollarında «Qırım.Neticeler» (Kremlniñ siyasiy mabüsleri qayd etildi), «Oleg Sentsov cedveli», «Pensiya yerine Qırımnı alıñız» yazuvlı şiarları bar edi.
Kotov özü, daa evel haber etilgeni kibi, Manejnaya meydanındaki marşal Jukovnıñ abidesi ögüne «Qırım – Ukrainadır» (ukrain tilinde) yazuvlı şiarınen çıqtı.
Onıñ bildirgenine köre, Rusiye politsiyasınıñ hadimleri bir qaç kere yanına kelgen edi, amma tutıp almadılar. Uquq qoruyıcılar faalniñ vesiqalarını baqtı. O, Ekstremizm ile küreş merkeziniñ hadimleri «video çıqardı», dep bildirdi.
Kotovnıñ aytqanına köre, yanına agressiv insanlar kelgen edi. Olar «Qırım – Rusiyedir, er vaqıt Rusiyege bağlı edi, amma Hruşçev onı alıp berdi», dep aytqan ekenler.
Keçkenler faalden «bayramlarını bozmamasını» rica etken edi.
«Qırımdan olğanını aytqan bir qadın yazuvlı şiarımnı çekip almağa tırıştı ve mında turmağa nasıl izin bereler, dep açuvlandı. FSBge foto yollamağa vade etti», – dedi Kotov.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
