Rusiye Modovanıñ separatist Pridnestrovye bölgesiniñ arbiylerini Ukraina ile cenkke celp ete bile. Bunı Ukraina Silâlı Quvetleriniñ Baş ştabı bildirdi.
"İşğalciler Ukraina ile cenkke tanılmağan Pridnestrovye-Moldova cumhuriyetiniñ 800-ge qadar arbiyiniñ celp ete bilecegini istisna etmey, amma bu şahsiy erkânnıñ maneviy-ruhiy alı alâ daa fena seviyededir", - dep yazıla bildirmede.
Baş ştabda, bar olğan malümatqa köre, çoqsayılı ğayıplar sebebinden Rusiye Federatsiyası "muvaqqat işğal etilgen Qırımda, Krasnodar ülkesinde ve Donetsk ve Lugansk vilâyetleriniñ ayrı bölgelerinde talimler sıfatında gizli seferberlik ömürge keçirmege devam ete; Ukraina topraqlarında cenkke göñüllilerniñ celp etilmesi üzre faaliyet başlandı.
Bundan ğayrı, ordunıñ yedeklerini arttırmaq içün arbiy yaşta olğan gençleriniñ Rusiye universitetlerinden quvulması alları da qayd etilgen.
Moldova akimiyeti bu malümatnı daa izaatlamadı.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete. Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
