Moskvanıñ Basman mahkemesi cuma künü sabıq advokat, muhalifetçi cemaat erbabı ve meşur yutub kanalınıñ saibi Mark Feyginniñ ğıyabiy apis etilmesi aqqında qarar aldı. Onı ordu aqqında yalan aytmaqta qabaatlaylar. Feygin çetelde buluna.
Davanıñ açıluvına sebep olğan şeyler aqqında bir şey aytılmay. Feygin Ukrayinağa qoltutuv aqqında açıqtan-açıq ayta. Rusiyeniñ Ukrayinağa istilâsından soñ onıñ Feygin Live kanalında Ukrayina prezidenti Ofisiniñ sabıq mesleatçısı Aleksey Arestoviçniñ iştiragi ile yayınlar pek populâr oldı (soñra olar toqtatıldı).
Keçken sene oktâbr ayında Feygin Rusiye İç işler nazirliginiñ qıdıruv bazasında peyda oldı. O, qaysı madde boyunca qıdıruvğa ilân etilgeni belli degil edi, amma TASS uquq qoruyıcı organlarına atıf etip, qıdıruv Feygin istenilmegen teşkilâtnıñ faaliyetinde iştirak etkeninen bağlı, em de Rusiyede terroristik olaraq tanılğan, Ukrayina içün cenkleşken "Rusiye Azatlığı" legionınıñ faaliyetini aydınlatqanınen bağlı, dep bildirdi. Daa evel Rusiye akimiyeti Feyginni "çetel agentleri" cedveline kirsetken edi.
Mark Feygin Devlet Dumasınıñ sabıq deputatı, muhalifet cemaat erbabı. Advokat edi. 2012 senesi Pussy Riot gruppasınıñ iştirakçilerini, soñra ise - Rusiyede mahkeme etilgen ukrayin arbiy hızmetçisi Nadejda Savçenkonı qorçaladı. 2018 senesi Feygin Rusiyede advokat statusından marum etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
