Moskva şeer mahkemesi qırımlı iş adamı Resul Velilâyev ve «KrımOpt» şirketiniñ müdiri Ali Bariyevni dekabrniñ 25-ne qadar apiste qaldırdı. Bu aqta Facebookta Velilâyevniñ tuvğanları bildire.
Haber etilgenine köre, mahkeme advokatnıñ itiraz arizasını red etip, Basmannıy mahkemesiniñ qararını deñiştirmedi.
Resul Velilâyev Qırımda iş adamı ve metsenat olaraq belli. Onıñ «KrımOpt» şirketi 1997 senesinden berli çalışa, «Güzel» ticaret ağı da oña ait.
İş adamı Resul Velilâyev ve «KrımOpt» şirketiniñ müdiri Ali Bariyev aprelniñ 26-nda Qarasuvbazarda Rusiye telükesizlik hadimleri Velilâyevge ait «Güzel» ticaret ağı ve «KrımOpt» şirketinniñ tükânlarını tintken soñ tutulğan edi.
Daa soñra, Velilâyev 2 ayğa tevqif etilerek, Moskvadaki Lefortovo taqiqat izolâtorına (SİZO) qapatıldı. Qırımda oña qarşı Rusiye Cinaiy kodeksiniñ 238-nci maddesiniñ 2-nci qısmına binaen («Telükesizlik talaplarına uymağan mallar ve mahsulatnıñ istisalı, saqlanması ya da satılması, ve bunıñ kibi de işlerniñ yapılması ve hizmetlerniñ kösterilmesi) boyunca iş açıldı.
Rusiye Qırımnı ilhaq etken soñ, mustaqil jurnalistler, cemaat ve qırımtatar milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilip başladı.
