Link açıqlığı

Saatnıñ esas haberi

Moskva mahkemesi Qırım yalısında zapt etilgen Ukraina askerlerini nezaret altında qaldırdı


Zapt edilgen ukrainalı askerlerden biri Sergey Tsıbizov
Zapt edilgen ukrainalı askerlerden biri Sergey Tsıbizov

Moskva şeer mahkemesi fevralniñ 12-nde FSB tarafından zapt etilgen Ukraina askerleri Yevgeniy Semidotskiy, Andrey Oprısko, Roman Mokrâk ve Sergey Tsıbizovnıñ apiske alınmasına qarşı berilgen advokat itirazlarını red etti.

Ukraina askerleri Jeneva konventsiyasınıñ 17-nci maddesine esaslanıp, oturışuvda malümat bermekten vazgeçti.

Ukrainalı askerler aprelniñ soñuna qadar Moskvanıñ «Lefortovo» SİZOsında qalacaq, dep bildire «İnterfaks» Rusiye haber agentligi.

Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.

Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».

Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.

Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.

Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.

XS
SM
MD
LG