Moskvanıñ Koptevskiy rayon mahkemesi Han saray müzeyinde keçirilgen «restavratsiya» işleriniñ tış hızmetçisine qarşı davanı red etti. Bunı oktâbrniñ 9-nda Rusiye advokatı Nikolay Polozov Qırım.Aqiqat Radiosınıñ yayınında bildirdi.
«Bir afta evelsi mahkemeden haber keldi, davanı qabul etmediler. Mahkeme bir qaç ay devamında qabul etilecekmi-yoqmı dep tüşündi, bizden qoşma vesiqa, şu cümleden UNESCO mektübini istedi. Mahkeme qararını daa körmedim, amma red cevabı belli. Elbette, Moskva şeer mahkemesine şikâyet berecekmiz, amma Rusiye mahkemeleriniñ Han sarayınen bağlı bir de bir dava baqacaqları yoq. Bundan evel OOO «Kiramet» hızmetçisine qarşı davanı Aqmescit Jeleznodorojnıy mahkemesine (Rusiye kontrolinde – QA) bergen edim, o da, davanı baqmağa istemedi. Rusiye akimiyeti ve adalet sisteması anda keçirilgen işlerniñ alını ögrenmege keder eteler», – dep qayd etti o.
Polozov, Han sarayındaki «restavratsiya» işleri aqqında davalar Rusiye mahkemelerinde qabul etilmese, Avropa insan aqları mahkemesine ketecek, dep bildirgen edi.
Malüm olğanı kibi, Qırımdaki Rusiye akimiyeti qırımtatar faallerine Bağçasaraydaki Han sarayında keçirilgen sahte tamir işleriniñ sebebini aydınlatqan vesiqalarnı köstermege razı olmay.
Qırımnıñ Rusiye akimiyeti Bağçasaraydaki Han sarayında «qazağa qarşı ilk işlerni» keçirmege devam ete.
Ukraina medeniyet nazirligi bildire ki, bu işler sebebinden Han sarayınıñ baş binası yıqıla bile.
Bağçasaraydaki Han sarayı muzeyi – qırımtatarlarnıñ tarihı ile alâqalı olğan eñ belli muzey, Qırımda olğan Geray hanlarına ait yazlıq rezidentiya yeridir. Muzey kompleskiniñ territoriyasında saray, harem binası, han mezarlığı ve cami bulunalar. O, UNESCOnıñ Dünya mirası cedveline kirsetilmege namzettir.
