«Strategiya-30» Rusiye teşebbüs gruppasınıñ faalleri noyabrniñ 30-nda aqşam Moskvanıñ Kurskiy vokzalı yanında «Siyasiy mabüs künü» aktsiyasını keçirdi. Narazılıq bildirgenler işğal altındaki yarımadada bloger ve jurnalist faaliyetinen oğraşıp apiske alınğan qırımlılarğa qoltuttı. Bu aqta aktsiya iştirakçilerinden biri Vera Lavreşina Qırım.Aqiqatqa tarif etti.
«Grani.ru» mühbiri Remzi Bekirov işğal etilgen Qırımda mühbirlik yapqanı içün terror maddesine istinaden 20 yılğa koloniyada qalmasına ya da atta ömür boyu apis cezasına üküm etile bile. Nariman Memedeminov, qırımlı bloger, «ekstremizmge çağırğanı içün» eki yıldan berli apiste yata. Osman Arifmemetov ve Rustem Şeyhaliyev vatandaş jurnalistleri olaraq qırımtatarlarnıñ vatanlarında taqip etilgenini tarif etkeni içün apiske alınğan edi», – dep qayd ete faaller Facebooktaki muracaatlarında.
Vera Lavreşinanıñ bildirgenine köre, soñki vaqıtları aktsiyalar raat keçe, provokatsiyalar olmay ve faaller tutulmay.
«İnsanlar tınçlandı, ücüm etmeyler. Repressiv qanunlar er kesni oturttı. Er keske tesir etti… «Sen çetel agentler sırasına yazıldıñmı?» yazuvlı şiarını yaptıq. Seyircilerimizden biri bu «meraqlı» yazuvlı şiarnen telefonğa foto yaptı, birisi ise qayd yazılmağa mümkün ve ne qadar para bereler, dep soradı», – dep tarif etti faal.
Remzi Bekirov, Osman Arifmemetov ve Rustem Şeyhaliyev bu sene mart ayında tutuldı. FSB tahqiqatı olarnı Rusiyede ve işğali altındaki Qırımda yasaqlanğan «Hizb ut-Tahrir» teşkilâtında iştirak etmesinde qabaatlay.
Bloger, vatandaş jurnalisti Nariman Memedeminov 2018 senesi mart ayında tutuldı. Onı terror faaliyetini kerçekleştirmege çağırğanında qabaatladılar. Rostov-na-Donu şeeriniñ Cenübiy arbiy okrugınıñ mahkemesi oktâbrniñ 2-nde onı 2 yıl ve 6 ay yaşav tarzı koloniyasında qalmasına üküm etti.
