Moskva civarındaki «Crocus City Hallda» olğan ücüm neticesinde 115 insan elâk oldı, dep haber etti Rusiye Tahqiqat komiteti martnıñ 23-nde.
«Crocus City Hall» kontsert salonında acele hızmetler elâk olğanlarnıñ cesedlerini taptı. Qıdıruv işleri devam ete», – dep aytıla haberde.
Martnıñ 23-nde Rusiye FSBsi ücümde iştirak etken şahıslar «Rusiye-Ukrayına sıñırından» keçecek edi, «Ukrayına tarafında bağları bar edi», dep bildirdi.
Rusiye Tahqiqat komiteti bildirgenine köre, «Ukrayına sıñırından uzaq olmağan Brânsk vilâyetindeki mahsus hızmetler ve uquq qoruyıcı organlar «Crocus City Hall» kontsert salonında terakt yapqan dört şübhelini tuttı.
«Crocus City Hall» ücümine alâqası olğanını «İslâm devleti» halqara terror teşkilâtı aydınlatqan edi. Umumen dava boyunca 11 insan tutuldı.
Martnıñ 22-nde aqşam kamuflâjlı urbada bir qaç insan kontsert salonında avtomatlardan ateş açıp, binanı ateşke berdi.
Rusiye Tahqiqat komiteti terakt maddesine istinaden cinnaiy tahqiqat başlattı. Rusiye kütleviy haber vastaları bildirgenine köre, terakttan soñ ücüm etkenler maşinada saqlandı.
«Agentstvo» neşiri qayd etkenine köre, «Crocus City Hallğa» qarşı ücüm – 2004 senesinden berli 300-den çoq insan elâk olğan Beslan mektebindeki ücüm vaqtından Rusiyede eñ büyük terakttır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
